Samstag, 9. Februar 2008

Bänke Fasnacht 2008

Schnitzelbänke 2008
www.die-drei-musketiere.ch


Auftritt im Restaurant Harmonie, 07.02.2008

Vor Formel Eis, dr Ralf Schumacher, isch ä Sibesiech
U üse bärner Schtapi wüsst, im Prinzip ou wimes miech
I eim Bereich hingäge, isch üse Alex eifach häller
Wüll bi üsem Schtapi louft, dr Williams eifach schnäller

Die Poller i dr Innestadt, vö langsam a räntiere
die bruuchtme drum für Demos jetz, zum de-eskaliere
Dr Thomas-Fudi-Fuchs hingäge, isch längschtens scho bereit
U wartet, sitzend, sehnlechscht druf,das ändlech eine ufe geit.

Eismal ds Bärn, muesch lose,
chunnt bir Grossdemonschtration
Ä lingge Löu cho ds gumpe
u pääget lut „Menschtruation“
I ha däm Löu du gseit: „los Löu
s heisst „Revolution“weme so tuet wüte
u mir seit dä Löu, das sig im Wurscht
hoptsach sig äs tüegi blüete

Si hei dr Willhelm Tell ufgfüehrt, ir Altstadt unger ds Bärn
Da bruchts die ganzi Volkspartei, ou die Lingge chöme gärn
u d Tschuggere hei gschleglet u hei knütschet was si möge
äs ma fasch alls vrlide wüll, dr Hügli tuets de bögle

D Armee het entschide, und befohle zack-zack
Tasche-Munition ghört nümme i Sack !
Los Armee, Du hesch pennet u vil ds spät beschlossse
Dr FC-Thun, het die Pfüpf doch scho längschtens vrschosse

„Me sött ä nöie Fernseh ha….Maa !“
Hett mir d Frou doch chürzlech gseit.
Mit Hadetivi,full Hade-digital,
u äs Bild nid ds höch dürfür schön breit.
„cumm schiess dä nöi Cheib zum Fänschter us“
Säg i zur Foru, „mir nä wider dr anger !“
Wüll ds Telebärn isch so no schlimmer
Das gseht ja us als wär die schwanger !

Mir Bänkler, mir hei mitem Nachwuchs Problem
All Jahr fählt ä Gruppe, das isch nid bequem
Jetz höre die Schwarze, gloubets üs sisch kei Witz
Im Parlamänt, het dr eint dert doch jetze ä Sitz

Wäg dr Schlöfbahn gites Stimme wo,
usem Bundeshuus chli murre
„Jetz schlats eim nid nur dinne
sondern ou vorem Huus uf d Schnurre.“
Mi tünkts vorusse fägts doch meh,
u wede gheisch gits geng no Schohner
hingäge zwar de d Landig isch,
im Bundeshuus de scho bequemer

üü di Brithney Spears, ja di isch chli vrcho
het sich d Bire rasiert, u so einiges gno
uftuunse und vollpumet, hei maschdi no bsinne
di het ja usgseh, als wettsi grad tour de France gwinne

Mit dr UBS nümm ds fride,
het ds Alinghi-Team vrchündet
Die Bank die heig ä schlächte Ruef,
drum heisi d Liebi kündet.
D Bank isch ir Branche fündig worde
Aber nur mit sehr vil Schwein
Zuegseit hei d Veterane,
vom Pontonierfahrverein.

Programmunterbruch: Ein Auszug von der
Weisung aus Dienstvorschrift Reinigungspersonal
Des Bundeshauses. Da steht unter Absatz 3 :

Im Bundeshaus, gibt’s für die Bodenbeläge
nicht mehr mit dem Blocher die Pflege.
zum Ausgleich des selbigen steht nämlich seit,
Neujahr ein wüstlicher Besen bereit.

Grossi Stedt i dr Schwiz, hei äs Zeicheli gsetzt
hei Sozialdedektiv, gäg Schmarozer igsetzt
U drum isch d Börse crasht, wüsst dir was isch passiert,
di IV-Bschisser hei mit „Panik-Verchöif“ reagiert

Woisch äch ds Füchsli, vo däm ghörsch nümm, sit de Wahle
Dä mues äuä vom Wahlkampf, no Rächnige zahle
Oder schribt dä am änd scho a sine „Annale“
Oder är gründet d Partei vo de „bruun-liberale“


Schnälldurchlouf

Auftritt im Restaurant Harmonie, 07.02.2008


Wenn eine tannigi Hose het und hagebuechig Strümpf
de chaner Tanze wie är wott, äs git ihm keiner Rümpf

üsi Hingis geit i d Ferie,
St.Moriz oh jeminee
Los Schätzeli , mi tünkts,
für Di hets dert ä chli ds vil Schnee!

„Das cheibe Tennis hets halt in sech“,
das dänkt sich äuä jetz die Frou
wüll wenn nid denn, de spätischtens jetze
hett die d Nase gschtriche voll

isches ächt so gsi oder nid?
Isch si suber oder hetsi gloge
Egal, ds mingscht hett die Hingis fffffft
mal ä suberi Linie zoge

Jedem Tierchen sein Pläsierchen
O bi de Sportler ischs gnau gliich
Was dr Martina ihri Linie,
isch füre FC-Thun dr Schtrich

nümm lang gits üsi Bundeswurscht
„I wirde se vrmisse“
di Servala-Prominänte
chöi sich de aber ou vrpisse

Würd äch die Därm mit dene Rinder drann
Ir Schwiz nid ou gedeihe?
me müesst de dr räscht vo dene Chueli
de wahrschinlech halt furtgheie

Ja üses Telebärn isch so fad
fasch wi, Sosse-lose-Salat
Sit die Michelle aber schwanger isch
Hets ds mingscht optisch chli Format

Du hesch Milliarde la vrschwinde,
Marcel Ospel, bisch ä Preller
Für üs drei hie isch klar
Du bisch dr nägschte Uri Geller

Isch Gouchepin bin, le President,
jetz ha ig petite Sörgele
ob Mengele oder Mörgele
mi tünkts me sött nid nörgele

Mit dere stadt dahie chunnts guet
Mir wünsche Muet und „rueghig Bluet“
Wobi äs paar so Bertarellis
Tät üsem Schtüürfuess schampar guet

U mir Drei si afa froh chöi mir jetzt de langsam höre
dä Lim da vode Schneutz, dä brönnt de grausam a dr Schnöre

So, das Ching wär gschouklet,
die Sach da hie isch gritzt
mir chöme nächscht Jahr wider
üsi Blofi si scho gschpitzt

Schprüch hei mir jetz keini me, mir hei nüt me i dr Hang
ds einzige wo mir no wei, isch Wein, Weib und Gesang !



Dr Schtapi Tschäppeli

Auftritt im Restaurant Harmonie, 07.02.2008

I bi dr Schtabi Tschäppeli, im ganze Land bekannt,
Mi Sitz dä isch nid waggelig, u ersch rächt nid vakant.
Bi zfride weni ds Nacht chli vou, u am Tag mis Cüpli ha,
u bi jeder Hundsvrlochete geng ds vorderscht vor cha schta

Das Stedtli wo ig leite sött, sig dräckig oh herrje
mi tünkt das aber halb so wild, ds Neapel heisi meh !
Vil wichtiger hingäge doch, als Ghüder , Schtunk u Puff
Isch Titelsite vom Bärnerbär mit mire Bire druff !

Äs Dänkmal setze, dasch mi Sport, äs wärde immer meh
Mis Stade de Suisse, mis Tram, d Wälle bim Bahnhof u bim Klee
u letschthin hani d Eurouhr, no ufgschtellt chli mit bschisse
u dr Baldachin gseht bländend us, we alli Tube drüber ….flüge

I blibe no äs Wiili da, ä Amtsduur oder zwee
und wenns den no sött nötig si, wurum nid ou no meh.
und chumi de vor d Himmelstüür, und wott ig ine gaa
de rüefe i „hei Peterus, dr Tschäppeli isch da !“

U chumi de vor d Himmelstüür, so schteit dr Petrus daa,
är rüeft mir zue: „hei los Du Depp, chasch wider abe ga !“
Die wähle Rot-Grüen nach wi vor, u tüe sich sälber plaageDe sölle die ou konsequänt, ihre Schtapi so ertrage !




Die drei Musketiere, Januar 2008