Freitag, 11. März 2011

Berner Fasnacht 2011 - Unsere Auftritte

Liebe Leut
Der gestrige Auftritt in der Harmonie bereits für Euch verfilmt und vertont!
Mit dreifachem Büchsensalut!

Vorspiel



Hauptteil



Schnelldurchlauf

Fasnacht 2011 - Unsere Schnitzelbänke

Die drei Musketiere

Gäg Durchfall heig är als probiert, het mir ä schlaue Meier gseit.
Banane, Schoggi, Sagmähl u Watte, s heig alles nüt abtreit !
Ou Chapsle wo är heig gno, sig wider cho, chum heig är se gässe
Ds mingscht heig är se gratis übercho, bir MIGROS a dr Kasse

Im schönen Italien, de tribts der Berlusconi
„Igge packe Zigge, igge figge ohni !“
Dä Silvio het jetz glich chli Angscht, äs chönnti drumm de dumm ga
Im Gfängniss gubs für Ihn drum de, ganz anders „bungabunga“

Im Deutschen draussen, wisst Ihr Leut, da geht es ziehmlich link
Dort wandelt sich ein Wetterfrosch,uf zmau zumne Schmutzfink
zu de Schwoobe passt dä guet, gloubets üs, da isch öppis drann
weil im Schranke von dem Herrn, da fehlen ein paar Kacheln-mann

a pros pos Wätterfrosch…..
da dä Bucheli, dä isch de nid öppe besser,
dä isch wine Zuehälter, ender no kresser
gnau glich skrupulos, äs tuet eim bau gruse
bi jedem Wätter schickt dä siner Meitli voruse !

ä Spanier, ä Ir une Griech si guet druff;
di Herre us dr EU, houes au drei i ds Puff
ä kene het Euros, dürfür jede ä Bitch
u zahlt het die Schissi schlussändlech dr Dütsch

jetz chöi mir d Waffe bhalte ja, mir hei das nid ganz grafft
das klaare Resultat, nid mal Lumengo hätt das gschafft
sit vierzg Jahr dörfe d Froue stimme, doch dasmal nid ganz frei,
vom Maa dr Louf am äcke, schribt ä Jedi „NEINEINEI !“

Lang, ewig lang het das Bohrloch denn grunne
Me het alles probiert u glich hets nüt brunge
U mir behoupte, üse Fuchs hät das Wunder vollbracht
Dä hätti, das Löchli mit Wonne vrmacht.

Psitache, Mandle, Vanille, Litchi, mit Ingwer o-la-la !
Granateöpfu, Sellerie, und ou mit Chocolat
mit Zimet, mit Mocca u mira mit Hasch, u wesi witer so tüe spinne
de gites Mandelbärli gar, mit Hackfleisch inne drinne

U das Bändli wo d Worber i Stadt sötti bringe
wülls nümm ganz blau isch, gits roti Gringe
drzue tuets no göisse, da muesch D Ohre vrha
drum wott mes nöi touffe: VU-VU-ZE-LA

Wo dr Herrgott d Wält erschaffe het,
mit Bärg u Tal, mit faltsch und richtig
Mit arm u rich, mit hübsch u hässlech,
weisch Petrus ds Glichgwicht das isch wichtig.
„Bir Schwiz schtimmts nid „ seit Peterus,
dert isch nur ds schönschte binenang
Zum Usglich weisch, seit da dr Chef,
isch grad Dütschland näbedrann.

Chürzlech si mir ds Dritte höch,
beritte über Land
U träffe ufnes Ougepaar
vrmummet immne Gwand
Mir heise gfragt: „hei Du Moslem?“
Da macht eis Oug ä Zwinker
„he Nei dir Esle uf öine Ross
I bi ne Hobby-Imker!“

Schnälldurchlouf:

Wenn eine tannigi Hose hett….

Gott sei getrommelt und gepfiffen,
jetz geit dä Moriz ändlech doch
und was het är hinderla…?
eifach nur äs riisigs Loch !

üse Stapi, dä tuet abnäh,
emu ds mingscht äs Bizeli
wobi das isch nid liecht
är isch ja nie äs Schwärgwicht gsi

U ds SP-Ursi schuumet Wyss
Wüll dr Ädu zieht i ds Stöckli
U dr Thomas Fuchs flutscht nache
dä macht vor Freud grad ds Böckli

önjie Ejaku-lat-falla-jökül
önje- ehrupt- ohnaisse
so oder emu ähnlech
het dä Vulkan doch gheisse

und uf di MIGROS-Nano-Toggle
si alli Chinder sehr vrsässe
und ganz rar si doch di Blaue
wüll die dr Papi geng wott frässe

im schönen Italien ja,
da geites zimmli harsch
der hets dr „Mehrlustohni“
mittlerwile rächt am Po!

E ma che fai, is nid so slimme gsi
magge bunga bunga mit de Ruby
igge ghoufe mit Moneta
ganze sigger nid e Strubi

Was unterscheidet d Gigi Oeri,
vomne Fuessball ohni Seich,
im Gägestz zum Gigi isch
bim Fuessball ds Läder weich

im Weschte vo dr Stadt,
dert wachst nid nur ä huufe Gras
das Bümpliz sig nüt gfröits
ä „Schissgägend“ sigi das

was sölle mir de ds Bümpilz tue,
ja mir hei doch fasch ke Macht
wüll bi üs uss säge sich
Fuchs u Hess guet nacht

Dr Erich seit zum Thomi,
los Thomi am liebschte gub
i Dir äs muntschi
ä Du bisch ä sone süesse,
gsesch us w ds Sennetuntschi

Vom Gutenberg, da höhrt man nix,
wine Aal het dä sich gwunde
ä Stellignahm ab ds gä sig schwär
uf google heigi är nüt gfunde

du wärsch ä schlächte Schnizubänker,
ja wende Hüür eis Wort nid seisch
u drumm chunnt ou zum Schluss vo üs
no äs härzhafts Bü-Bü-Bündnerfleisch

ZUGABE
Bundesrats Zählreim

Sieben kleine Bundesräte warn es an der Zahl
Doch 1984 kam das Lisi Kopp zur Wahl

Fünf kleinen Bundesräten wurde langsam bange
denn Inzwischen hocken schon, zwei Hühner auf der Stange

Ein paar jährchen später, ja da warn si noch zu viert
Auch damals hat die Wählerschaft nid grad vil Studiert

Nur noch drei Mannen sind`s, und nimmt man es genau
weil der Ueli keine Eier hat ist der auch fast eine Frau